Hō͘ sih-nah tiān--tio̍h ê 鋼琴家      創作日期:2020/05/31

有chi̍t 日，伊 kâng-khóaⁿ 做醫生 ê khang-khòe，無想 hiah-nī chē，下班了就 beh 轉去 chhù chiah-pn̄g￮

有當時仔意外發生了siuⁿ kín，就tī 轉去chhù ê 路--ni̍h，hiông-hiông 落大雨，彼時伊 i chhoah-chi̍t-tiô，只好用 phāiⁿ-á cha̍h 伊 ê 身軀，m̄-koh因為真正落 siuⁿ tōa-chūn，伊teh-beh tòng-bōe-tiâu￮

就 tī chit 時，雷公sih-nah teh siám-sih，tân 第 3 聲 ê 時，伊soah 昏去￮你講，伊 thài-ē hiông-hiông按呢，其實伊 hō͘ 雷公tiān--tio̍h，tiān chi̍t-ē 死死昏昏--khì￮

有人khòaⁿ-tio̍h 伊 tó tī hia，tō 緊叫救護車kā 送去 pēⁿ-īⁿ￮Hó-ka-chài 經過治療了，伊 koh 恢復精神 teh 看診￮

M̄-koh，自從伊hō͘ 雷公kòng--tio̍h 了，一直想 beh 彈琴，伊 mā m̄-chai in-toan 出tī 佗位￮

伊細漢 ê 時，有學過幾冬 ê 鋼琴，m̄-koh後來升學時在真 bô-êng，就無koh 繼續學--ah￮

Koh 講轉來，伊想beh 彈琴，有一工hioh-khùn ê 暗眠，伊拍開琴蓋，chhōe 出 Beethoven ê 琴譜來彈￮ Eh? Sī-án-chóaⁿ 彈了才順--tio̍h? 連伊家己 mā m̄-chai--leh!

M̄-koh伊有chi̍t ê 衝動，就是想beh 一直彈--lo̍h-khì￮

Só͘-pái 伊連開 ê 診所就關--khì-lâi，In bó͘-kiáⁿ mā sa-bô-cháng!

伊有法度練超過 12點鐘 ê 琴，就算無 chia̍h-pn̄g 伊 mā bōe 感覺腹肚 iau￮

Koh khah hō͘ 人想無--ê 是，伊 kā 伊 ê 朋友講，伊 beh 去各國辦演奏會，kā in講，若是chhōe 無伊莫siuⁿ 意外￮

Bóe--á 伊真正有夠厲害，練 kah 古典 ê啥物曲lóng ē￮就自我推薦去 pat kok 開音樂會￮

Koh 有挑戰成功，去各國世界表演，chit ê 故事是真有夠不可思議，連練幾若冬鋼琴 ê 我，mā bô châi-tiāu tī 正式 ê 大舞台頂表演--neh!

實在是真怪奇，hit ê 醫生原本 ê 頭路就無做--ah! 變成chi̍t-ê 旅行世界 ê 全職鋼琴家!

白話字版

Ū chi̍t ji̍t, i kâng-khóaⁿ chò i-seng ê khang-khòe, bô siūⁿ hiah-nī chē, hā-pan liáu tō beh tńg-khì chhù chiah-pn̄g.

Ū tang-sî-á ì-gōa hoat-seng liáu siuⁿ kín, tō tī tńg-khì chhù ê lō͘--ni̍h, hiông-hiông lo̍h tōa-hō͘, hit sî i chhoah-chi̍t-tiô, chí-hó iōng phāiⁿ-á cha̍h i ê sin-khu, m̄-koh in-ūi chin-chiàⁿ lo̍h siuⁿ tōa-chūn, i teh-beh tòng-bōe-tiâu.

Tō tī chit sî, lûi-kong sih-nah teh siám-sih, tân tē 3 siaⁿ ê sî, i soah hun-khì. Lí kóng, i thài-ē hiông-hiông án-ne, kî-si̍t i hō͘ lûi-kong tiān--tio̍h, tiān chi̍t-ē sí-sí-hun-hun--khì.

Ū lâng khòaⁿ-tio̍h i tó tī hia, tō kín kiò kiù-hō͘-chhia kā sàng-khì pēⁿ-īⁿ. Hó-ka-chài keng-kòe tī-liâu liáu, i koh hôe-ho̍k cheng-sîn teh khòaⁿ-chín.

M̄-koh, chū-chiông i hō͘ lûi-kong kòng--tio̍h liáu, it-ti̍t siūⁿ beh tôaⁿ-khîm, i mā m̄-chai in-toan chhut tī tó-ūi.

I sè-hàn ê sî, ū o̍h-kòe kui tang ê kǹg-khîm, m̄-koh āu-lâi seng-ha̍k si̍t-chāi ū-kàu bô-êng, tō bô koh kè-sio̍k o̍h--ah.

Koh kóng tńg-lâi, i siūⁿ beh tôaⁿ-khîm, ū chi̍t kang hioh-khùn ê àm-sî, i phah khui khîm-kòa, chhōe chhut Beethoven ê khîm-phó͘ lâi tôaⁿ. Eh? Sī-án-chóaⁿ tôaⁿ liáu chiah sūn--tio̍h? Liân i ka-tī mā m̄-chai--leh!

M̄-koh i ū chi̍t ê chhiong-tōng, tō-sī siūⁿ beh it-ti̍t tôaⁿ--lo̍h-khì.

Só͘-pái i liân i khui ê chín-só͘ tō koaiⁿ--khì-lâi. In bó͘-kiáⁿ mā sa-bô-cháng!

I ū hoat-tō͘ chi̍t kang liān chhiau-kòe 12 tiám-cheng ê khîm, tō sǹg bô chia̍h-pn̄g i mā bōe kám-kak pak-tó͘ iau.

Koh khah hō͘ lâng siūⁿ bô--ê sī, i kā i ê pêng-Iú kóng, i beh khì kok-kok pān ián-chàu-hōe, kā in kóng, nā-sī chhōe bô i mài siuⁿ ì-gōa.

Bóe--á i chin-chiàⁿ ū-kàu lī-hāi, liān kah kó͘-tián ê siáⁿ-mi̍h khek lóng ē. Tō chū-ngó͘ thui-chiàn khì pat kok khui im-ga̍k-hōe.

Koh ū thiau-chiàn sêng-kong, khì kok-kok sì-kè piáu-ián, chit ê kò͘-su sī chin-lâng chin-sū kái-piān--ê, ū-kàu put-khó-su-gī, liān kúi nā tang kǹg-khîm ê góa, mā bô châi-tiāu tī chèng-sek ê bú-tâi téng piáu-iáⁿ--neh！

Si̍t-chāi sī chin koài-kî, hit ê i-seng goân-pún ê thâu-lō͘ tō bô chò--ah! Piàn-chiâⁿ chi̍t-ê lú-hêng sè-kài ê chôaⁿ-chip kǹg-khîm ka!

*刊登tī教會公報社NO.3694(2022/12/15)